देवगड फाटा, ता. नेवासा येथे रात्रीचे वेळी जबरी चोरी करणारी टोळी जेरबंद, स्थानिक गुन्हे शाखा अहमदनगरची कारवाई.

संतोष औताडे- मुख्य संपादक.नेवासा                    दिनांक :- 27/11/2023

——————————————————-

प्रस्तुत बातमीची हकिगत अशी की, दिनांक 19/11/2023 रोजी फिर्यादी श्री अजित सिद्राम गुळवे वय – 26 वर्षे, रा. शिंगोणी, ता. माळशिरस, जि. सोलापुर हे त्याचेकडील पिकअप गाडीसह सोलापुर या ठिकाणी जात असतांना त्यांना रस्त्यामध्ये झोप लागल्याने त्यांनी त्यांचेकडील पिकअप गाडी छत्रपती संभाजीनगर ते अहमदनगर रोडवरील देवगड फाटा, ता. नेवासा या ठिकाणी रोडचे कडेला लावुन गाडीमध्ये झोपले असता अज्ञात 3 आरोपींनी येवुन त्यांना शिवीगाळ करुन जिवे मारण्याची धमकी दिली व त्यांचेकडील तसेच गाडीमधील क्लिनर यांचेकडील मोबाईल रोख रक्कम असा 73,000/- रुपये किमतीचा मुद्देमाल बळजबरीने चोरुन नेला होता. सदर बाबत फिर्यादी यांनी दिलेल्या फिर्यादीवरुन नेवासा पोलीस ठाणे गु.र.नं. 1080/2023 भादवि कलम 392, 34 प्रमाणे गुन्हा दाखल करण्यात आलेला आहे.
सदर घटना गंभीर स्वरुपाची असल्याने मा. श्री. राकेश ओला साहेब, पोलीस अधीक्षक, अहमदनगर यांनी पोनि/श्री. दिनेश आहेर, स्थानिक गुन्हे शाखा अहमदनगर यांना स्थानिक गुन्हे शाखेतील पोलीस अधिकारी व अंमलदार यांचे पथक नेमुन सदर गुन्हा उघडकिस आणणे बाबत सुचना दिल्या होत्या.
नमुद आदेशान्वये पोनि/श्री. दिनेश आहेर यांनी स्थानिक गुन्हे शाखेतील पोउपनि/तुषार धाकराव, पोहेकॉ/दत्तात्रय गव्हाणे, पोना/रविंद्र कर्डीले, संदीप दरंदले, ज्ञानेश्वर शिंदे, फुरकान शेख, संतोष खैरे, किशोर शिरसाठ, प्रशांत राठोड, चापोहेकॉ/संभाजी कोतकर अशा पोलीस अधिकारी व अंमलदार यांचे पथक नेमुन गुन्ह्याचा तपास करुन गुन्हा उघडकिस आणणे बाबत आवश्यक सुचना देवुन पथकास रवाना केले. पथकाने लागलीच घटना ठिकाणास भेट देवुन घटनाठिकाणचे आजुबाजुचे सी.सी.टी.व्ही. फुटेजची पाहणी करुन तसेच अशा प्रकारे गुन्हे करणारे आरोपी, जेलरिलीज आरोपींची माहिती घेत असतांना तांत्रिक विश्लेषणाचे आधारे तसेच गुप्त बातमीदारामार्फत सदरचा गुन्हा हा शाहरुख सत्तार खान रा. पानीवीस कॉलनी, ता. जि. जालना याने व त्याचे इतर दोन साथीदारांनी केला असल्याची माहिती मिळाल्याने शाहरुख सत्तार खान यास जालना या ठिकाणावरुन ताब्यात घेवुन त्यास विश्वासात घेवुन विचारपुस करता त्याने त्याचे साथीदारासह गुन्हा केल्याची कबुली दिल्याने 1) शाहरुख सत्तार खान वय 23 वर्षे, रा. पानीविस कॉलनी, ता. जि. जालना, 2) दिपक लक्ष्मण भुसारे वय 27 वर्षे, रा. गोकुळवाडी, ता. जि. जालना यांना जालना या ठिकाणावरुन व आरोपी नामे 3) ओंकार उर्फ मंथन प्रफुल्ल ताठीया वय 22 वर्षे, रा. वडगांव बु, ता. जि. पुणे यास वडगांव बु या ठिकाणावरुन दिनांक 25/11/2023 रोजी ताब्यात घेण्यात आले असुन त्यांचेकडुन 54,500/- रुपये किमतीचा मुद्देमाल हस्तगत करण्यात आला आहे. ताब्यात घेण्यात आलेल्या आरोपींना नेवासा पोलीस स्टेशन येथे हजर केले आहे. पुढील तपास नेवासा पो.स्टे. करीत आहे.
सदरची कारवाई मा. श्री. राकेश ओला साहेब, पोलीस अधीक्षक, अहमदनगर, श्रीमती. स्वाती भोर मॅडम, अपर पोलीस अधिक्षक श्रीरामपुर व उपविभागीय पोलीस अधिकारी, श्री. सुनिल पाटील साहेब, शेवगांव विभाग यांचे सुचना व मार्गदर्शना खाली स्थानिक गुन्हे शाखेचे पोलीस अधिकारी व अंमलदार यांनी केलेली आहे.