संतोष औताडे (मुख्य संपादक) दिनांक-16/07/2022
नेवासा फाटा येथे गोळीबार तरुणाच्या डोक्यात बाटली फोडली परिसरात एकच खळबळ.
सविस्तर माहिती- नेवासा फाटा परिसरात दुचाकीवरून आलेल्या तीन जणांपैकी एकाने हवेत तीन गोळीबार केले. तर दुसऱ्याने त्या ठिकाणी उभ्या असलेल्या एका तरूणाच्या डोक्यात काचेची बाटली फोडली. या घटनेनंतर परिसरात एकच धावपळ उडाली. काल सायंकाळी साडेसात वाजेदरम्यान नेवासा फाटा ते नेवासा दरम्यान असलेल्या तहसीलदार यांचे निवासस्थान असलेल्या रोडसमोर ही घटना घडली.
या घटनेची माहिती मिळताच नेवासा पोलीस ठाण्याचे पोलीस निरीक्षक विजय करे यांनी तत्काळ घटनास्थळी धाव घेऊन चौकशी केली. घटनास्थळावरून दोन ऊडालेल्या गोळ्यांच्या कॅप व एक जिवंत काडतूस पोलिसांनी जप्त केले असून त्याठिकाणी तीन ते चार प्रत्यक्षदर्शींचे जबाब पोलिसांकडून नोंदविण्यात आले.
सायंकाळी सात वाजेच्या दरम्यान तीन जण नेवासा फाट्याकडून दुचाकीवर आले. सेंट मेरी स्कूल समोरील रोडवर आल्यानंतर दुचाकी थांबवत एकाने हवेत तीन गोळीबार केले. तर दुचाकीवरील दुसऱ्याने दुकानासमोर उभ्या असलेल्या एका तरूणाच्या डोक्यात काचेची बाटली मारली. डोक्यातून मोठ्या प्रमाणात रक्तस्त्राव झाल्याने गंभीर जखमी झालेल्या या तरुणाला नेवासाफाटा येथील शासकीय रुग्णालयात दाखल करण्यात आले.
पोलीस निरीक्षक करे यांनी परिसरात कुठे सीसीटीव्ही फुटेजमध्ये ही घटना कैद झाली आहे का याचा शोध घेण्याचा प्रयत्न केला आहे. सदर घटना कशामुळे घटली याबाबत कोणतीही माहिती मिळाली नाही. नेवासा फाटा परिसरात पुन्हा एकदा गुन्हेगारी वाढत चालली आहे असं नागरिकांकडून बोलले जात आहे.सदर घटनेचा तपास नेवासा पोलीस करीत आहेत.
